Muqdisho,(insidesomalia.org)-Wareegto kasoo baxday maanta xafiiska ra`iisal wasaaraha Somaliya Nuur Xasan Xuseen (Nuur Cadde) ayaa waxaa xilkii Gudoomiyenimo iyo kii duqa Magaalaba looga qaaday Gudoomiyihii Gobolka Banaadir Maxamed Cumar Xabeeb (Maxamed Dheere).

Wareegtadan oo uu u akhriyay saxaafadda afhayeenka Dowladda Federlaaka KMG ah ee Soomaliya Cabdi Xaaji Goob doon ayaa ku sheegay sababaha looga qaaday xilka gudoomiyaha ey ka mid tahay cabashooyin laga keenay xagiisa oo dhinaca amaanka ah iyo in uu kali talisnimo u muujiyay ragii la shaqeynayay.

Qodobada xilka looga qaaday Maxamed Dheere oo ahaa ilaa dhowr qodob ayaa waxaa sidoo kale ka mid ahaa in xubnihii isaga la shaqeynayay ey inta badan isugu dheceen arimo la xiriira howlaha gobolka iyo in uu sidoo kale gacanta ku dhigay dhamaan dhaqaalihii Gobolka.

Maxamed Dheere ayaa waxaa loogu baaqay in wixii maanta ka danbeeya uu howlihii shaqo si kumeel gaar ah ugu wareejiyo ku xigeenkiisa dhimaca arimaha bulshada Dhagaxtuur.

In dhaweydba waxaa isqab qabsi iyo xurguf u dhaxeysay Gudoomiyaha Gobolka Banaadir Maxamed Dheere iyo inta badan ku xigeenadiisa, kuwaas oo sheegay ineysan la shaqeyn karin Maxamed Dheere, waxaana kal hore khilaafkan xaliyay Madaxda Sare ee dowladda kadib markii ashtako gudbiyeen.

Maxamed Dheere ayaa jagada iminka laga qaaday hayay ku dhawaad sanad iyo bar, waxaana intii ka horeysay jagadaasi uu gacanta ku hayay qeybo ka mid ah gobolka Shabeelaha Dhexe oo xarun u aheyd magaalada Jowhar.